Në një takim me studentët e Universitetit “Aleksandër Moisiu” në Durrës, kreu i SPAK, Altin Dumani, theksoi se lufta kundër korrupsionit kërkon angazhimin e të gjithë institucioneve dhe shoqërisë së bashku. Ai njoftoi se, pavarësisht se SPAK është krijuar rreth pesë vite më parë, sot ai funksionon plotësisht dhe ka arritur rezultate të dukshme.
Dumani pranoi se institucioni ka hasur sfida gjatë kësaj periudhe, por theksoi se bilanci i punës është i matshëm dhe konkret. Ai nënvizoi se SPAK ka ngritur akuza ndaj individëve me pozita të rëndësishme politike, përfshirë kryetarë bashkish, deputetë dhe ministra. Rreth 50% e personave të akuzuar kanë marrë tashmë vendime nga gjykatat, sipas tij një tregues i rëndësishëm i progresit.
Në përfundim të mandatit të tij, Dumani shprehu kënaqësi për arritjet e SPAK, dhe njoftoi se të martën e ardhshme do t’i dorëzojë detyrën Klodian Brahos, i cili do të udhëheqë këtë institucion për tre vitet e ardhshme. Takimi me studentët ishte organizuar nga Komiteti i Helsinkit dhe Bashkimi Evropian, në kuadër të diskutimeve mbi temën e korrupsionit.
