Reshjet e dendura të shiut, të shoqëruara me shkarkesa elektrike, kanë shkaktuar probleme në Lezhë dhe në disa zona përreth. Qyteti është përballur me vërshime, sidomos në bllokun e banimit “11 Janari” dhe “11.2 Hektare” nga lagjja “Besëlidhja”, ku niveli i ujit arriti deri në 40 centimetra. Kjo situatë ka bllokuar hyrjet e pallateve dhe e ka vështirësuar lëvizjen e këmbësorëve dhe automjeteve.
Shërbimet e emergjencës janë angazhuar për të ndihmuar në largimin e ujit dhe për të parandaluar dëmtimin e katove të para të banesave. Po ashtu, uji ka përfshirë disa zona të rrugës Lezhë–Shëngjin, ku një pemë e rrëzuar kishte bllokuar qarkullimin. Kanali i ujërave të larta në Zadrimë ka dalë nga shtrati dhe ka përmbytur disa hektarë tokë bujqësore në Kallmet.
Autoritetet lokale kanë njoftuar se grupet e emergjencës dhe mjete të pastrimit janë në terren për të normalizuar situatën. Ato kanë apeluar qytetarët të shmangin lëvizjet e panevojshme në zonat e prekura. Po ashtu, në Bashkinë e Kurbinit, reshjet kanë sjellë vështirësi, sidomos në qytetin e Laçit, ku janë raportuar përmbytje në Gjorm dhe Zheje.
Moti i keq ka dëmtuar gjithashtu rrjetin elektrik në disa zona, duke shkaktuar mungesë energjie kryesisht në fshatra. Grupet e OSHEE-së janë të angazhuar për riparimin e defekteve dhe bashkitë kanë angazhuar mjete për të ndihmuar në normalizimin e situatës dhe trafikut.
Në HEC-et e Qafë Mollës dhe Ulzës, prurjet janë rritur, por ende nuk është arritur niveli kritik që kërkon hapjen e portave. Situata është nën monitorimin e vazhdueshëm nga strukturat e Mbrojtjes Civile.
