Pas një bllokimi prej 8 orësh të aksit rrugor Librazhd-Qafë Thanë, lëvizja është rikthyer në të dyja drejtimet. Ky aks është pjesë e korridorit të VIII, një nyje kyçe për lidhjen e juglindjes së Shqipërisë.
Shërbimet e Policisë Rrugore, përfshirë patrullat e Përgjithshme dhe Shqiponjat, janë të pranishme përgjatë kësaj rruge për të monitoruar lëvizjen e automjeteve. Në këtë periudhë me fluks të shtuar trafiku, Policia Rrugore e Elbasanit kërkon nga drejtuesit e mjeteve që të jenë të kujdesshëm, të qëndrojnë në radhë dhe të respektojnë me rigorozitet rregullat e qarkullimit.
Ekipet e punës kanë realizuar ndërhyrje për të shembur faqen e malit që përbënte rrezik, duke siguruar kështu një kalueshmëri të sigurt pas hapjes së rrugës. Gjatë periudhës së bllokimit, qindra gra, fëmijë dhe të moshuar u mbajtën në kushte të vështira. Për shkak të ngarkesës së madhe të trafikut, policia rekomandoi për drejtuesit që të përdorin aksin alternativ Maliq-Lozhan-Moglicë-Gramsh-Elbasan për të arritur në Tiranë.
Ky bllokim ndodhi pikërisht në ditën e diel, kur shumë pushues kthehen nga juglindja, duke e bërë këtë aks rrugor tejet të ngarkuar dhe problematik.
