PSG ka fituar Ligën e Kampionëve për sezonin 2024/25 pasi mposhti Interin me rezultat të thellë 5-0 në finalen e zhvilluar në Munich.
“Ne dështuam të bënim gjithçka që kishim përgatitur. Urime Paris Saint-Germain për një ndeshje të jashtëzakonshme. Ata nuk bënë asnjë gabim dhe e merituan”. Kështu e nisi reagimin e tij kapiteni i Interit, Lautaro Martinez, pas humbjes 5-0 në finalen e Ligës së Kampionëve ndaj PSG-së.
Pavarësisht rezultatit të rëndë, sulmuesi argjentinas ruajti qetësinë dhe vlerësoi paraqitjen e kundërshtarit, duke e pranuar se PSG-ja ishte superiore në çdo aspekt të lojës.
“Jam krenar për ekipin, trajnerin dhe klubin. Patëm një sezon të shkëlqyer, edhe pse nuk arritëm të fitojmë asnjë titull,” deklaroi Lautaro për “Sky Sport”.
Martinez theksoi se skuadra dha gjithçka në fushë dhe se humbja megjithëse e rëndë, nuk duhet të errësojë rrugëtimin e bërë deri në finale.
“Fitoret kanë rëndësi, por edhe mënyra si ngrihesh pas një disfate. Ne duhet të rikthehemi më të fortë dhe të fillojmë nga e para me të njëjtin shpirt,” tha ai.
Kapiteni e përshkroi humbjen si të dhimbshme, por jo demoralizuese. Ai shtoi se Interi ka ende shumë për të dhënë në sezonet e ardhshme.
“E kemi treguar veten gjatë gjithë vitit. Kjo humbje dhemb, por jam krenar për çdo shok skuadre dhe për rrugën që bëmë për të arritur këtu,” përfundoi Lautaro.
