Në Gjimnazin “Ali Demi” në Vlorë, atmosfera e kësaj të mërkurë ishte mbushur me heshtje dhe dhimbje pas humbjes tragjike të 17-vjeçarit Leandro Shametaj, nxënës i vitit të tretë. Leandro humbi jetën në një aksident rrugor te bulevardi kryesor të qytetit, teksa kthehej nga puna, pak pas mesnate.
Ambientet e shkollës ishin të mbushura me trishtim. Në klasën e tij, banka kishte mbetur bosh, ndërsa shokët e tij kishin vendosur një buqetë lulesh si shenjë respekti dhe kujtimi për mikun e tyre. Një pankartë ngushëllimi ishte vendosur në shkollë, ku nxënësit dhe mësuesit kishin shprehur dhimbjen e thellë për humbjen, duke bërë një apel për drejtësi.
Mësuesit dhe bashkëmoshatarët përshkruan Leandron si një nxënës të përkushtuar dhe punëtor, i cili gjatë kohës së lirë punonte për të ndihmuar familjen e tij. Sot, nxënësit, mësuesit dhe familjarët e Leandros i dhanë lamtumirën e fundit duke e kujtuar atë si një djalë me ëndrra të mëdha, të cilat u prenë tragjikisht.
Lamtumira iu dha me ritin e zakonshëm të ndarjes nga jeta, duke shprehur dhembjen për humbjen e një personi të ri dhe plot jetë. Në murin e shkollës, pankarta e vendosur nga shokët e klasës përmbante një mesazh të prekshëm: “Për Leandron, mikun dhe vëllain tonë. Gëzo me engjëjt Leandro.” Kjo ngjarje ka prekur thellë të gjithë komunitetin shkollor dhe ka sjellë një reflektim mbi rrezikun e aksidenteve rrugore për të rinjtë. Ajo që filloi si një ditë si të tjerat, përfundoi me dhimbje dhe nostalgji për një jetë të shkurtër, por të mbushur me ëndrra.
