Sipas gazetës britanike ‘Financial Times’, qeveria e re laburiste e Britanisë së Madhe planifikon të shpallë këtë muaj një skemë për futjen e kartave digjitale të identitetit, me qëllim reduktimin e emigracionit ilegal. Një nga format që po shqyrtohet është dhënia e këtyre kartave për të gjithë shtetasit britanikë dhe ata që kanë të drejtën e qëndrimit, duke legalizuar statusin e tyre. Ndryshe nga shtetasit e kontinentit evropian, britanikët aktualisht nuk disponojnë karta identiteti, përveç pasaportave të tyre.
Ish-kryeministri laburist Toni Bler kishte tentuar të krijonte një sistem të tillë në fillim të viteve 2000, por nuk arriti të kishte sukses. Sipas planit të ri, kartat e identitetit do të shërbejnë për të kontrolluar emigrimin ilegal, duke bërë që autoritetet të verifikojnë statusin e punës ose të qirasë për individët, përfshirë shqiptarë dhe kombësi të tjera që jetojnë dhe punojnë ilegalisht në Britani.
Një nga sfidat e mundshme është se ata që jetojnë ilegalisht mund të përdorin karta identiteti fals të vendeve të tjera të Bashkimit Evropian, një praktikë që është e zakonshme në Britani. Kryeministri Starmer ka theksuar se këto karta dixhitale do të ndihmojnë në uljen e atraksionit të Britanisë si destinacion për emigrantët që kërkojnë të jetojnë dhe punojnë ilegalisht. Një sondazh i Financial Times zbulon se 53% e publikut britanik mbështet përdorimin e identifikimit digjital, ndërsa një e pesta është e kundërta.
Në fillim të këtij viti, qeveria britanike shpalli gjithashtu krijimin e një aplikacioni qeveritar që do të mundësonte akses në mijëra shërbime publike përmes smartphone-ve, një model shumë i ngjashëm me sistemin e e-Albania në Shqipëri. Kjo nismë, nëse e realizuar, do të përfaqësonte një hap të rëndësishëm në modernizimin e administratës publike dhe në menaxhimin e emigracionit.
