Drejtoria e Përgjithshme e Burgjeve njofton se më 25 janar 2026, në IEVP Shkodër, ka ndërruar jetë Nicolae Ionnut Erion Deliver, i lindur më 23 mars 2005 në Rumani dhe banues në Shkodër. Ai ishte arrestuar më 7 tetor 2024 dhe ishte akomoduar në këtë institucion më 10 tetor 2024 me masën e sigurisë “Arrest në burg” për akuzat e “Vjedhjes me dhunë” dhe “Prodhimit dhe shitjes së narkotikëve”.
Sipas informacionit paraprak, në mëngjesin e ditës së ngjarjes, Deliver është konstatuar nga personeli i shërbimit duke qëndruar në shtrat, gjë që ka bërë të nevojshme njoftimin e menjëhershëm të personelit shëndetësor. Pas vlerësimit mjekësor, janë evidentuar parametra jetësorë të ulët dhe është ofruar ndihmë e parë, me rekomandimin për dërgim të menjëhershëm në urgjencën e spitalit rajonal.
Ai është transportuar me urgjencë drejt Spitalit të Koplikut, duke marrë ndihmën mjekësore nga stafi shëndetësor gjatë rrugës. Megjithatë, në urgjencën e spitalit, mjeku ka konstatuar se Nicolae Deliver kishte ndërruar jetë.
Institucioni ka njoftuar menjëherë organet kompetente dhe është angazhuar për të bashkëpunuar në sqarimin e rrethanave të ngjarjes, në përputhje me procedurat ligjore në fuqi. Drejtoria e Përgjithshme e Burgjeve shpreh gatishmërinë për të ofruar çdo informacion të mëtejshëm, sipas ligjit.
