ITALI – Media italiane “La Stampa” ka raportuar denoncimin e Partisë Demokratike në Itali, ku shprehen se në kampin e Gjadrit kanë shkuar 41 emigrantë, ndërsa tani kanë mbetur vetëm 25 prej tyre. Është mister fati i 16 emigrantëve, për të cilët media italiane shkruan se nuk figurojnë në qendrat e riatdhesimit të Italisë në Gjadër. Nuk dihet nëse ata mund të jenë rikthyer në Itali në pritje të riatdhesimit, ose nëse janë në qelitë e ndërtuara brenda kampit për shkak të trazirave të disa javëve më parë aty.
artikulli i la stampa
Kaosi dhe dhuna shpërthyen në kampin e Gjadrit ku janë vendosur emigrantët nga Italia për riatdhesim pas dekreteve të dëbimit. 20 prej tyre protestuan duke dëmtuar mobiliet dhe infrastrukturën e qendrës dhe duke shkaktuar kaos. Xhamat e thyera, dyshekët e shkatërruar dhe shtëpitë e plaçkitura janë vetëm disa nga shenjat e lëna nga dhuna e emigrantëve. Ndërkohë pas hetimeve të kryera mbi këto trazira, u raportua se 10 emigrantë janë futur në qelitë e burgut të ndërtuara brenda objektit posaçërisht për raste të tilla. Ata do të mund të takohen vetëm me avokatët e tyre.
Më 19 prill, ministri i Brendshëm i Italisë, Matteo Piantedosi njoftoi se është kryer riatdhesimi i parë nga Shqipëria i një shtetasi të huaj që ishte vendosur para pak ditësh në kampin e Gjadrit. Emigranti është kthyer në vendin e tij të origjinës. Piantedosi shprehet se operacionet e riatdhesimit të migrantëve të parregullt do të vazhdojnë edhe në ditët në vijim siç parashikohet nga strategjia e Qeverisë për një veprim më efektiv për të luftuar imigracionin e paligjshëm. Shtetasi i riatdhesuar ishte një 42-vjeçar nga Bangladeshi i ardhur në Itali në vitin 2009 dhe që ishte dëbuar për shkak të rrezikut social. Ai ka disa dënime të mëparshme, duke përfshirë një episod të rëndë të dhunës në familje.
