Guvernatorja e shtetit Masaçusets (Massachusetts) Maura Healey shpalli gjendjen e jashtëzakonshme të martën, duke theksuar prurjet e mëdha të migrantëve që kërkojnë strehim në një kohë kur kostoja e strehimit vazhdon të rritet.
Rreth 5,600 familje ose më shumë se 20,000 njerëz, shumë prej të cilëve janë emigrantë, aktualisht jetojnë në strehimore shtetërore. Mes tyre ka foshnja, fëmijë të vegjël dhe gra shtatzëna. Guvernatorja Healey tha se është një rritje prej rreth 80% krahasuar me 3100 familje një vit më parë.
Shumë prej migrantëve po mbërrijnë me avion nga shtete të tjera.
“Këto shifra pasqyrojnë rritjen e prurjeve të migrantëve në vendin tonë, të cilët kanë përjetuar disa nga udhëtimet më të vështira që mund të imagjinohen.”
Ajo i bëri thirrje qeverisë federale për ndihmë financiare dhe në mënyrë më urgjente, përshpejtimin e autorizimeve të punës për të lejuar të ardhurit e rinj që të gjejnë punë sa më shpejt dhe të fillojnë të fitojnë jetesën, shkruante ajo në një letër drejtuar Sekretarit të Sigurisë Kombëtare, Alejandro Mayorkas.
“Të ardhurit janë të etur për të punuar. Gjëja e fundit që ata duan është që të jenë të varur”, tha ajo.
Guvernatorja Healey u ka bërë thirrje organizatave dhe njerëzve të interesuar që të ndihmojnë me sa të munden për të sponsorizuar apo strehuar migrantët.
Të hënën, kryetari i bashkisë së Nju Jorkut Eric Adams, njoftoi një plan për të strehuar deri në 2,000 migrantë në lagjen Queens.
Disa shtete të udhëhequra nga republikanët, si Teksasi dhe Florida, i kanë transportuar migrantët me autobusë ose aeroplanë drejt shteteve dhe qyteteve të udhëhequra nga demokratët, si Kaliforni, Masaçusets, Nju Jork dhe Çikago.
Vitin e kaluar, guvernatori i Floridës, Ron DeSantis, dërgoi me avion 49 migrantë venezuelianë në ishullin Martha’s Vineyard të shtetit Masaçusets, që njihet si zonë pasanikësh.
