Qyteti Toyoake në prefekturën Aichi të Japonisë ka propozuar një kufizim për përdorimin e smartfonëve, duke bërë thirrje për që të gjithë përdoruesit të kufizojnë kohën e tyre online në vetëm dy orë në ditë jashtë orarit të punës ose shkollës. Ky projekt është ende në draft dhe do të jetë një rekomandim, pa ndëshkime për ata që nuk e respektojnë.
Kryebashkiaku Masafumi Koki ka theksuar se qëllimi i këtij kufizimi është parandalimi i problemeve fizike dhe mendore që lidhen me përdorimin e tepërt të teknologjisë, përfshirë çrregullimet e gjumit. Kjo nismë parashikon që nxënësit e shkollave fillore të mos përdorin telefonat pas orës 21:00, ndërsa ata të shkollave të mesme dhe të rriturit pas orës 22:00.
Megjithatë, propozimi ka shkaktuar një reagim të fortë në rrjetet sociale, ku shumë qytetarë e konsiderojnë atë si të papranueshëm. Një përdorues shprehu mendimin se dy orë janë shumë pak për të parë një film ose për të lexuar një libër. Disa të tjerë theksuan se vendimet për përdorimin e telefonave duhet të jenë në dorën e familjeve dhe jo të autoriteteve. Këtë diskutim e theksoi edhe një anketë e publikuar nga Agjencia e Fëmijëve dhe Familjeve, e cila tregonte se të rinjtë japonezë kalojnë mesatarisht mbi pesë orë në ditë online gjatë javës.
Projektligji do të shqyrtohet javën e ardhshme, dhe nëse miratohet, pritet të hyjë në fuqi në tetor. Ky shqetësim për përdorimin e smartfonëve nuk është i ri; në vitin 2020, prefektura Kagawa miratoi një vendim të ngjashëm, duke kufizuar përdorimin e lojërave për fëmijët dhe ndalimin e përdorimit të pajisjeve pas orarit të caktuar për grupmosha të caktuara.
Nisma e Toyoake është pjesë e një tendence më të gjerë në Japoni për të adresuar shqetësimet e shëndetit mendor dhe fizik që lidhen me teknologjinë dhe përdorimin e saj të tepruar.
