Kuvendi i Shqipërisë do të mblidhet sot në orën 17:00 në një seancë të jashtëzakonshme për votuar ministrat e rinj, të cilët u dekretuan paraditen e sotme nga Presidenti i Republikës Bajram Begaj.
Katër orë pas nisjes së seancës parlamentare, kreu i grupit parlamentar të PD, Gazment Bardhi i ka dërguar një kërkesë Kuvendit, që ndryshimet në qeveri të bëhen përms një debat.
Kryetari i Grupit Parlamentar të PD Gazment Bardhi ka kërkuar që ndryshimet në përbërjen e Këshillit të Ministrave të bëhen përmes një debati parlamentar.
“Përbërja e Këshillit të Ministrave nuk është një produkt privat i Kryeministrit, që gëzon vetëm të drejtën kushtetuese të propozimit të saj, por caktimi është një ndërveprim institucional mes tre institucioneve Kryeministër-President i Republikës-Kuvendi i Shqipërisë. Në këtë rast, Kuvendi i Shqipërisë nuk mund të ketë rol formal, vetëm në certifikimin e vullnetit personal të Kryeministrit, por duhet të diskutojë dhe vlerësojë në meritë propozimet dhe dekretet e ardhura”, shkruhet në kërkesën e Bardhit.
Grupi Parlamentar i PD kërkon që debati të zhvillohet në një kohë prej 6 orësh.
“Duke qenë se jemi përpara ndryshimit të përbërjes së Këshillit të Ministrave, që nënkupton një përbërje të re të tij, në përputhje me nenet 12, 46, 48 dhe 110 të Rregullores së Kuvendit, kërkojmë që shqyrtimi i Dekreteve të Presidentit që ndryshojnë përbërjen e Këshillit të Ministrave t’i nënshtrohen debatit parlamentar, prej 6 orësh, të ndarë në mënyrë proporcionale mes grupeve parlamentare”, shkruhet në kërkesën zyrtare të Grupit Parlamentar të PD.
