Trageti i linjës Vlorë–Brindisi ka hasur në vështirësi për të ankoruar në portin e Vlorës për shkak të kushteve të këqija atmosferike dhe erës së fortë, që rrezikojnë përplasjen me kalatën. Aktualisht, rreth 800 pasagjerë dhe 150 automjete kanë prenotuar për të udhëtuar sot, por nisja është pezulluar për arsye sigurie.
Sipas informacioneve zyrtare, pritet një tentativë tjetër për ankorim në orën 13:00, nëse kushtet e motit e lejojnë. Trageti qëndron në rad, ndërsa anijet e vogla janë ankoruar në Triport. Ndërkohë, është njoftuar se nga data 2 deri më 7, mjetet e peshkimit do të qëndrojnë të ankoruara në Triport, deri në një njoftim të ardhshëm nga Kapitaneria e Portit.
