Presidenti i Partisë së Lirisë, Ilir Meta i cili ndodhet në ambientet e burgut 313 që prej arrestimit të bujshëm, jep shpesh intervista në studio të ndryshme ku flet për përditshmërinë në qeli.
Së fundmi ai ka dhënë një intervistë për “Euronews Albania”, ku ndër të tjera ka treguar se ka preferuar të qëndrojë në burg në Tiranë, për të mos munduar familjarët dhe miqtë që të udhëtojnë shumë për ta takuar.
“Dua të jem pranë prindërve, motrës dhe fëmijëve. Nuk dua të “lodh” shumë edhe avokatin meqenëse edhe ju e kërkoni nëpër studio. Por dua të jem edhe sa më pranë drejtuesve të Partisë së Lirisë”.
Meta u pyet se si po vepron në kushtet e mungesës së palestrës, të cilën disa javë më parë ua kërkoi gardianëve, ai tha se kush ka dëshirë mund ta shpikë palestrën edhe brenda qelisë së burgut.
“Për sa i takon palestrës e kam thënë edhe më parë se një njeri që s’ka vullnet edhe po të flejë në palestrën më të mirë mund të mos bëjë asgjë. Ndërsa ai që ka vullnet e shpik “palestrën” edhe në 15m2…Dita ime është e mbushur kryesisht me lexime, shënime, kujtime dhe me letra që u shkruaj kolegëve, miqve e të afërmve dhe po kështu duke lexuar letrat e tyre. Po qëndroj vetëm, por nuk ndihem vetëm. Ndërkohë bëj ushtrime të ndryshme stretching, etj”, tha Meta.
