Në vitin 2025, shqiptarët morën paga më të larta se vitin e kaluar, me paga mesatare bruto për një të punësuar që arriti në 86,984 lekë, duke shënuar një rritje prej 4.3% krahasuar me vitin 2024. Sektorët që ofrojnë paga më të larta vazhdojnë të jenë aktivitetet financiare dhe të sigurimit, me 173,283 lekë, si dhe sektori i informacionit dhe komunikacionit me 131,165 lekë.
Rritja më e madhe e pagave me 10.6% është regjistruar në Forcat e Armatosura, ndërsa edhe administrata ka përfituar, me paga më të larta për specialistët, bluzat e bardha dhe mësuesit. Klodian Muço, ekspert ekonomie, theksoi se kjo rritje në administratë krijoi presion të ngjashëm në sektorin privat, ku pagat e punëtorëve të kualifikuar gjithashtu kontribuan në rritjen e pagave.
Në tremujorin e katërt të vitit 2025, shkalla e pjesëmarrjes në fuqinë punëtore për popullsinë 15-64 vjeç arriti në 75.9%, me një rritje prej 0.4 pikë përqindje krahasuar me vitin 2024. Megjithatë, krahasuar me tremujorin e mëparshëm, ky tregues pati një rënie prej 0.6 pikë përqindje, për shkak të ciklikës ndër sezonale të ekonomisë shqiptare, ku sezoni veror rrit numrin e punësimeve dhe të ardhurat e buxhetit shtetëror.
Bujqësia, përkundrazi, pësoi një rënie të punësimit prej 9.7%. Sektorët e bujqësisë vijojnë të ndeshen me financim të ulët dhe marzhe të ulta fitimi. Industria gjithashtu shfaqi një bilanc negativ me një rënie prej 0.7%. Sfidat për këtë sektor përfshijnë normat e këmbimit, rritjen e kostos së prodhimit dhe rënien e kërkesës nga tregjet e huaja.
Rritja e pagave në sektorin e hotelerisë dhe turizmit nuk ka ndikuar në përfshirjen e shqiptarëve në këto biznese. Si rezultat, shumë prej këtyre bizneseve po e plotësojnë stafin me punonjës nga vendet e treta.
