Bota e kinemasë dhe televizionit është në zi për ndarjen nga jeta të Remo Girones, aktorit italian të njohur për rolin e tij legjendar si Tano Cariddi në serialin “La Piovra”. Ai ndërroi jetë në moshën 76-vjeçare në Monte Karlo, ku kishte jetuar për shumë vite.
Karriera e Girones filloi në fillim të viteve ’80, kur ai u shndërrua në një figurë të njohur të ekranit italian me zërin e tij të thellë dhe prezencën skenike. Për publikun shqiptar, Tano Cariddi mbetet një nga personazhet më karakteristikë, duke ndikuar thellësisht në epokën televizive të kohës.
I lindur më 1 dhjetor 1948 në Asmara, Girone fillimisht studioi ekonomi përpara se të ndiqte pasionin e tij për aktrimin në Akademinë e Arteve Dramatike. Gjatë karrierës së tij, ai u shfaq në dhjetëra filma dhe teatro, duke bashkëpunuar me emra të njohur të kinemasë italiane e botërore.
Në jetën personale, ai kishte një marrëdhënie të gjatë me aktoren Victoria Zinny, partnere e tij që nga vitet ’80. Gjatë xhirimeve të “La Piovra”, ai përballi një luftë të vështirë me kancerin, të cilin arriti ta mundte falë forcës dhe vendosmërisë së tij.
Remo Girone do të mbetet në kujtesën e publikut për elegancën, zërin e tij unik dhe aftësinë për të interpretuar personazhe komplekse. Ai është një nga figurat më të respektuara të kinemasë italiane dhe ka lënë një gjurmë të thellë edhe në kulturën shqiptare.
