TIRANË– Një prokuror është kërcënuar nga një “boss” i krimit, i cili aktualisht është strehuar në Dubai. Kërcënimin e hetuesit të tij e konfirmoi vetë kreu i Strukturës së Posaçme kundër Krimit të Organizuar, Altin Dumani. Por nuk bëri me dije asnjë detaj, as për emrin e hetuesit dhe as për kërcënuesin. Vendndodhjen e këtij të fundit e bëri me dije gazetarja Anila Hoxha para disa ditësh në emisionin “Top Story”.
“Jam duke ndjekur historinë e kërcënimit të një prokurori nga një prej “djemve” të Dubait, të këtyre që konsiderohen…Ka gjetur mënyra tagente për të dërguar mesazh tek prokurori. Çështja ka alarmuar institucionet ligjzbatuese në Shqipëri. Çështja ka alarmuar institucionet dhe po hetohet me seriozitet, por personi do trë vazhdojë që të jetë i paprekshëm. Fakt është që është e pamundur sepse nuk ka një marrëveshje për kapjen e tyre. Praktika është afër zeros. Duhet shpresuar që ata të bëjnë një gabim të pamatur që të shkojnë në një shtet tjetër dhe të arrestohen sepse nuk ekziston një ligj, nuk sillen në Shqipëri. Edhe ai që u soll ka shprehur dakordësinë,”-tha ajo gjatë fjalës së saj dy ditë më parë.
Lajmin e konfirmoi sot edhe Dumani, i cili gjithashtu e pranoi publikisht se krimi i organizuar ka kërcënuar familjen e një prokurori. Megjithatë sqaroi se kërcënimi kishte nga bota e krimit, e jo nga politika.
“Krimi i organizuar ka kërcënuar familjen e një prokurori. Më shqetëson kërcënimi nga krimi i organizuar , jo kërcënimi nga politika. Ne kemi bërë llogari edhe që mos kthehemi, sepse kjo është detyra jonë të hetojmë. Prokurorët janë imunë, janë të gjithë të përgatitur që t’i përballojnë këto situata, por në fund të fundit e kemi zgjedhur vetë këtë detyre,”-sqaroi Dumani sot.
