Kryetari i Lëvizjes Vetëvendosje, Albin Kurti ka thirrur në një takim liderët e dy partive më të mëdha opozitare, Memli Krasniqin e Partisë Demokratike të Kosovës dhe Lumir Abdixhikun e Lidhjes Demokratike.
Ky hap i Kurtit shihet si një përpjekje për të gjetur një rrugëdalje për konstituimin e parlamentit të Kosovës.
Kosova ende nuk ka formuar institucionet pas zgjedhjeve të 9 shkurtit. Kjo për shkak të mospajtimeve mes Vetëvendosjes dhe forcave të tjera politike për kandidaturën e Albulena Haxhiut si kryetare e Kuvendit.
Seanca për konstituimin e parlamentit e nisur më 15 prill ka dështuar tetë herë radhazi, pasi Vetëvendosje nuk ka arritur të sigurojë votat e nevojshme për Albulena Haxhiun.
Megjithatë Lidhja Demokratike e Kosovës nuk do t’i shkojë Albin Kurtit, në takimin e thirrur për të biseduar për konstituimin e legjislaturës së nëntë të Kuvendit të Kosovës.
Besian Mustafa, zëdhënës për media në LDK u shpreh se ftesën tashmë e kanë pranuar dhe se kryetari i këtij subjekti, Lumir Abdixhiku, për momentin nuk është në Kosovë.
“Ka ftesë. Nuk marrim pjesë në takim, njëkohësisht kryetari Abdixhiku nuk është në Kosovë”, ka thënë Mustafa.
