Pas Bledi Çuçit, Edi Rama shkarkoi edhe ministren e Financave, Delina Ibrahimaj. Të gjithë prisnin orën 17:30 të mbledhjes së asamblesë për vendimet e mëdha. Por vetëm pak orë përpara mbledhjes në media doli lajmi i shkarkimit.
Paraprakisht, jo e konfirmuar zyrtarisht, mësohet se Edi Rama i njoftoi Ibrahimajt largimin nga detyra në mbledhjen e qeverisë që u zhvillua në mesditë.
Arsyet e shkarkimit nuk dihen. Emri i personit që do ta zëvendësojë Delina Ibrahimajn ende nuk është bërë i ditur. Ndoshta mund të mësohet gjatë punimeve të asamblesë Kombëtare të Partisë Socialiste, e cila do të nisë rreth orës 17:30.
Ibrahimaj e mori detyrën më shtator 2021 duke shërbyer në këtë detyrë për më pak se dy vjet. Në vitin 2016 e në vijim ajo ka qenë anëtare e Këshillit të Statistikave, INSTAT.
Në vitin 2019 u emërua në detyrën e Drejtorit të Përgjithshëm të Tatimeve, të cilën e mbajti deri në vitin 2021, përpara se të emërohej ministre dhe sot u largua nga detyra.
