Është hapur këto ditët, një debat i madh për çështjen e prishjes së pishinave të “Prestige Resort” në pronësi të botuesit dhe pronarit të një grupi të madh mediatik në vend, (News 24, BallkanWeb, Panorama, Gazeta Shqiptare), Irfan Hysenbelliu.
Këto medie por edhe mjaftë analistë dhe sidomos një tabor i madh deputetësh dhe politikanësh nga ana e opozitës Berisha- Meta, po e trajtojnë këtë çështje si një sulm të egër dhe fashist kundër medies së lirë.
Të tjerë thonë se në fakt e gjitha kjo po ndodh thjesht si pasojë e prishjes së pazareve, apo flakjes si “limon i shtrydhur”, nga ana e Edi Ramës. Kjo palë rikujton flirtet e Hysenbelliut me kryeministrin, miqësinë e bujshme me Taulant Ballën dhe afinitetin që vazhdon edhe në këto ditë që i ka shpallur “luftë” pushtetit, me kryetarin e Bashkisë së Tiranës, Erion Veliajn.
Gjithsesi edhe pse çështja duket ende e ngatërruar, askush nuk e mohon faktin se Edi Rama vërtet demonstroi një veprim fashist duke ndërhyrë dhunshëm (me leje apo jo) te pishinat e botuesit të madh. Gjithashtu askush nuk e vë në dyshim, se kryeministri nuk e bëri këtë veprim sepse “ka shtet ligjor” dhe po vendos drejtësinë në një resort, ku drekonte edhe vetë.
Si kujtesë po rikthen një ngjarje të 7 viteve më parë në kulmin e skandalit “Tahiri” me kushërinjtë e tij, Habilaj, trafikantë droge të cilin e denoncoi me guxim ish-shefi i Antitrafiqeve të Drejtorisë së Policisë së Fierit, Dritan Zagani.
Rrëfimin e tij tronditës në atë kohë që u realizua nëpërmjet një interviste me gazetarin Basir Çllaku, ja besoi “Gazetës Shqiptare” dhe News 24, prej 4 vitesh në pronësi të Hysenbelliut.
Pasi u transmetuan dy puntatat e para nga 4, papritur ai denoncim tronditës për lidhjet e qeverisë Rama me krimin e organizuar, u ndërpre. Arsyet i tregoi në atë kohë vetë gazetari Basir Çollaku.
Ne po i sjellim të plota, por ju paralajmërojmë se censura nuk u bë me fadroma, por vetëm me një telefonatë e cila nuk dihet se çfarë solli më pas në shkëmbim…
Denoncimi i gazetarit Basir Çollaku në datë 4 shtator 2015 në faqen e tij në FB
Stop transmetimit të intervistës së Dritan Zaganit. Presioni dhe kërcënimet e Qeverisë, kryeministrit Edi Rama dhe ministrit të brendshëm Sajmir Tahiri mundën Median News 24 dhe Gazeta Shqiptare.
Gazeta Shqiptare dhe Tv Neës 24 kishin një marrëveshje profesionale me mua për të transmetuar në mënyrë eksluzive, intervistën e ish-shefit të Antitrafiqeve të Drejtorisë së Policisë së Fierit, Dritan Zagani, që unë kisha bërë si në audio dhe në video.
Ditën e parë u botuan dy faqe intervistë dhe pjesa video që përkonte me atë çfarë ishte zbardhur në Gazetën Shqiptare.
Për këtë korrektësi i kam falenderuar.
Por duket trazira kaperceu profesionistët dhe në dorë e mori situatën mediatike Qeveria. Me urdhër dhe presion të saj, nuk u lejua transmetimi i pjesës së dytë dhe të tretë.
Unë kam qenë bashkë me kolegët e Neës 24 në redaksi kur materiali ishte thuaj i gatshëm për transmetim dhe para se të ndodhte, erdhi urdhri kategorik, nga lart siç thuhet:
Në asnjë mënyrë të mos transmetohet as në televizion, as në gazetë!
Me gjithë dëshirën, drejtuesit profesionalë nuk mundën të kapërcenin urdhrat e botuesve dhe ata urdhrat dhe presionin e qeverisë si të Kryeministrit dhe të ministrit të brendshëm.
Unë ftoj mediet të përcjellin me transparencë këtë intervistë denoncuese, të asaj që po bën trafiku dhe krimi. Do ta hedh në faqen time falë mungesës së censurës nga Zuknbergu, si e vetmja mundësi ku qeveria nuk ndërhyn dot.
Intervistën e plotë të zbardhur, sepse nuk është transmetuar mbi 50 për qind e saj dhe materialin video, do ta hedh në faqen time dhe cilado media e çmon të dobishme në misionin e saj, ta publikoje. Lexuesi ka humbur aleatët e vet. Pa deformime.
