Bashkia e Vlorës është sërish në qendër të vëmendjes për një tender të dyshimtë që ngre hije të forta abuzimi dhe favorizimi. Në fokus këtë herë është një procedurë e zhvilluar nga Ndërmarrja e Shërbimeve Publike Vlorë, me objektin:
“Blerje pllaka varroshi për sektorin e Mirëmbajtjes së Varrezave”, me një fond limit prej 10.8 milionë lekësh pa TVSH.
🟥 Tenderi ka marrë shenjën “RedFlag”, një paralajmërim për rrezik të lartë korrupsioni dhe shkeljesh të ligjit. RedFlag përdoret në rastet kur tenderët karakterizohen nga skualifikime të dyshimta, mungesë konkurrence reale apo procedura të manipuluara për të favorizuar një fitues të paracaktuar.
Në këtë rast konkret, të gjithë operatorët konkurrues janë skualifikuar, përveç njërit – pikërisht atij që shpallet fitues: kompania EN-BJO, me një ofertë 9,430,000 lekë pa TVSH, shumë afër fondit limit, çka ngre dyshime të mëdha për mungesë gare reale.
❗Përse është shqetësues ky tender?
- 4 kompani në garë: EN-BJO, COLOMBO, ARTEO 2018 dhe VËLLEZËRIT KUKA.
- Fituesi: vetëm një, pasi të gjithë të tjerët u skualifikuan pa arritur të konkurrojnë realisht.
- Tenderi konsiderohet me risk të lartë korrupsioni, sipas analizës automatike të platformave të transparencës (si Open Data Albania).
🔍 Çfarë po ndodh në Bashkinë e Vlorës?
Tenderi i zhvilluar më 20 maj 2025, me njoftim fituesi më datë 2 maj, është financuar tërësisht nga buxheti i Bashkisë Vlorë – çka do të thotë, me paratë e qytetarëve vlonjatë. Për më tepër, kjo nuk është hera e parë që prokurimet publike në këtë institucion shënojnë “flamur të kuq” për mungesë konkurrence dhe transparence.
Përballë këtij fakti, kryebashkiaku Ermal Dredha ka detyrimin të japë sqarime. Ai nuk mund të fshihet pas zyrës së prokurimit apo drejtuesve të ndërmarrjeve publike, kur vetë tenderat janë pjesë e zinxhirit të keqmenaxhimit institucional.
🛑 Pyetja që ngrihet është e thjeshtë:
Pse duhet të kushtojë mbi 9 milionë lekë blerja e pllakave për varreza dhe pse çdo vit tenderët publikë në Vlorë zhvillohen me të njëjtin skenar: një fitues, garues formalë dhe mungesë transparence?
Në një kohë kur qytetarët vuajnë nga mungesa e shërbimeve bazë dhe infrastruktura në varreza lë për të dëshiruar, këto miliona për pllaka varroresh me procedura të dyshimta janë një tallje.
SPAK dhe KLSH duhet të hetojnë me urgjencë tendera të tillë që mbajnë erën e abuzimit me fondet publike.
