Me qëllim parandalimin dhe goditjen e tentativave për kultivim të bimëve narkotike, Policia e Fierit ka vijuar me kontrolle masive në terren.
Janë angazhuar 100 punonjës policie të ndarë në 11 grupe, për të bërë kontrollin e imtësishëm të çdo pjese të territorit të qarkut Fier. Gjithashtu janë përdorur edhe 3 dronë që janë në dispozicion të Drejtorisë Vendore të Policisë Fier.
Si rezultat, janë kryer 190 kontrolle në ambiente të hapura, si në: sera, minisera, tunele, banesa të braktisura, magazina dhe objekte të ndryshme. Gjithashtu janë kontrolluar zona të cilësuara me risk dhe zona në të cilat vitet e kaluara është tentuar të kultivohen bimë narkotike.
Gjatë kontrolleve, në një zonë të pyllëzuar në fshatin Martinë, u gjetën të kultivuar disa fidanë kanabis.
Vijon puna për dokumentimin e plotë të këtij rasti, si dhe identifikimin dhe kapjen e personave të përfshirë në këtë veprimtari kriminale.
