Pozitat për ndryshimin e formatit të kualifikueseve për Evropianët dhe Botërorët po shtohen. UEFA po shqyrton mundësinë e modifikimit të sistemit aktual me synimin për ta bërë atë më atraktiv dhe konkurrues. Një nga propozimet është një model me grup unik, siç zbatohet në kompeticionet e klubeve, përkatësisht Champions, Europa dhe Conference League. Kjo do të thotë se kombet do të përzgjidhen nëpërmjet një algoritmi për ndeshjet kualifikuese.
Gazeta gjermane ‘Bild’ raportoi për këtë zhvillim dhe citon presidentin e UEFA-s, Alexander Ceferin, i cili tha se “nuk besoj se Kampionati Evropian do të ndryshojë, por ndoshta ndeshjet kualifikuese do të kenë një format më interesant”. Ai përjashtoi mundësinë e rritjes së numrit të ndeshjeve, duke theksuar se synohet një organizim më tërheqës.
Sipas ‘Bild’, ky ndryshim është propozuar nga një përfaqësues anglez gjatë një takimi në Malaga dhe pritet të aplikohet për ndeshjet kualifikuese të Zonës Evropiane për Kupën e Botës pas Evropianit të 2028, që do të lidhet me kualifikueset për Botërorin e 2030. Po ashtu, Komisioni i Garave për skuadrat kombëtare në UEFA ka formuar një grup pune për të shqyrtuar të gjitha propozimet.
Ky grup pune do të mblidhet në fund të muajit tetor dhe ka për qëllim të prezantojë propozime të detajuara në mbledhjen e Komitetit Ekzekutiv të UEFA-s më 3 dhjetor. Ky zhvillim shfaq një përkushtim të UEFA-s për të modernizuar formatin e garave dhe për të rritur interesin në kualifikimet e nivelit të lartë, duke ofruar një eksperiencë më konkurruese për të gjitha kombet pjesëmarrëse.
