Xhanluixhi Donaruma luan sonte një nga ndeshjet më të rëndësishme të karrierës së tij, finalen e Ligës së Kampioneve në të cilën ai mund të bëhet një hero duke shkruar historinë për klubin e PSG-së që nuk e ka fituar asnjëherë më parë këtë turne.
Por kjo mund të jetë njëkohësisht edhe ndeshja e tij e fundit me parisienët në turneun në fjalë. Sipas asaj që raportojnë mediat italiane, Donaruma është i hapur ndaj ndryshimit të skuadrës gjatë verës dhe bëhet e ditur se klubi i Napolit është gati të bëjë një ofertë për portierin, që ta kthejë në vendlindje.
Antonio Konte ka kërkuar përforcime për të bërë një skuadër të madhe dhe një cikël fitues me pretendime edhe në arenën ndërkombëtare. Ndaj De Laurentis do të përpiqet ta kënaqë duke filluar nga porta, me Donarumën i cili shihet si kandidati kryesor për të mbrojtur katërkëndorin e kampionëve të saposhpallur të Serisë A.
