Kryetari i Kuvendit të Shqipërisë, Niko Peleshi, zhvilloi një vizitë zyrtare në Austri, ku u takua me Kryetarin e Parlamentit austriak, Walter Rosenkranz. Ky takim shënoi fillimin e një faze të re të diplomacisë parlamentare shqiptare për avancimin e procesit të anëtarësimit në Bashkimin Europian. Peleshi theksoi se, përveç mbështetjes që Shqipëria merr nga Komisioni Europian dhe Parlamenti Europian, është esenciale sigurimi i mbështetjes edhe nga parlamentet kombëtare dhe qytetarët e vendeve të BE-së.
Duke vlerësuar rolin historik të Austrisë si aleat të Shqipërisë, Peleshi theksoi angazhimin austriak për integrimin e Shqipërisë dhe të vendeve të Ballkanit Perëndimor, duke e konsideruar këtë proces një vlerë të shtuar për BE-në dhe për stabilitetin në Evropë. Të dy palët diskutuan nevojën për të zgjeruar bashkëpunimin dypalësh në të gjitha fushat dhe për të intensifikuar bashkëpunimin parlamentar.
Një pjesë e rëndësishme e takimit u fokusua në rolin aktiv të Shqipërisë në nismat rajonale që kontribuojnë në dialogun dhe integrimin europian të Ballkanit Perëndimor. Peleshi theksoi se Shqipëria dhe Austria janë partnerë të rëndësishëm në fushën e sigurisë dhe ndajnë qëndrime të përbashkëta mbi mbrojtjen e vlerave demokratike.
Pjesa tjetër e diskutimit u përqendrua në mbështetje për Kosovën, përfshirë avancimin e njohjeve dhe dialogun Prishtinë-Beograd. Të dy vendet riafirmuan angazhimin e tyre për të mbështetur Ukrainën dhe përpjekjet për ruajtjen e paqes në Evropë.
Peleshi komentoi gjithashtu mbi marrëdhëniet historike me Austrinë, duke theksuar se vizita e tij është një reflektim i lidhjeve të forta, jo vetëm politike, por edhe emocionale dhe njerëzore. Ai përmendi mbështetje historike që Austria ka ofruar për inteligjencën shqiptare dhe bashkëpunimin akademik midis universiteteve të të dy vendeve.
