Andrei Kovaçeviç, kryetar i Komisionit Parlamentar të BE-së për Anëtarësimin e Ballkanit Perëndimor, ka shprehur rëndësinë e procesit të integrimit europian për të dyja palët. Ai theksoi nevojën për pranimin e shpejtë të vendeve të Ballkanit Perëndimor në BE, duke u vlerësuar secila sipas meritave dhe avancimit të reformave. Në këtë kuadër, Shqipëria u përmend si një nga vendet më të avancuara në këtë proces.
Kovaçeviç riktheu theksin në nevojën për reformim, pajtim dhe përmbushjen e kushteve europiane për tërë Ballkanin. Ai nënvizoi që Shqipëria dhe Mali i Zi ndodhen në fazën më të avancuar të negociatave për anëtarësim, me shpresën se në vitet e ardhshme disa vende të rajonit do të mirëpriten si anëtarë të plote të Bashkimit Europian.
Për të përmirësuar marrëdhëniet mes vendeve, Kovaçeviç kërkoi investime në lidhjet fqinjësore, si dhe mundësi për të rinjtë për të studiuar në çdo vend që dëshirojnë. Ai argumentoi se kufijtë duhet të bëhen simbolikë, siç është praktikuar në vende të tjera, duke përfshirë Bullgarinë, e cila është pjesë e zonës Shengen.
Ai shprehu besimin se Shqipëria dhe shoqëria shqiptare janë tejet pro-evropiane dhe se një bashkim në këtë drejtim është i mundur nëse shumica dhe opozita punojnë së bashku për të arritur anëtarësimin e shpejtë në BE. Kovaçeviç përmendi se negociatat për anëtarësim duhet të nisin sapo Republika e Maqedonisë së Veriut të plotësojë kushtet e nevojshme.
Në lidhje me marrëdhëniet me Maqedoninë e Veriut, ai nënvizoi se Bullgaria mbështet këtë vend në procesin e integrimit të saj europian, duke kërkuar përfshirjen e komunitetit bullgar në Kushtetutë dhe evitimin e diskriminimit ndaj identitetit të tyre.
Përfundimisht, Kovaçeviç përsëriti se të gjitha vendet e Ballkanit Perëndimor janë të mirëseardhura në BE, por duhet të kalojnë proceset e nevojshme për reformim dhe pajtim me të kaluarën për të forcuar shanset për anëtarësim.
