Kryeministri i Groenlandës, Jens-Frederik Nielsen, ka theksuar se sovraniteti i Groenlandës është një “vijë e kuqe” e panegociueshme dhe ka shprehur kundërshtimin e tij ndaj çdo diskutimi që nënkupton humbjen e kontrollit mbi territorin. Ai foli në një konferencë për mediat në Nuuk, ku u pyet për spekulimet mbi mundësinë që Shtetet e Bashkuara të kërkojnë pronësi mbi pjesë të Groenlandës. “Ne jemi të gatshëm të diskutojmë shumë gjëra, por sovraniteti është një vijë e kuqe,” theksoi ai.
Nielsen e konsideroi retorikën e vitit të kaluar, ku u përmend blerja e Groenlandës, si “e papranueshme”, duke reflektuar shqetësimin e banorëve për deklaratat e palës amerikane. Ai ndau gjithashtu frustrimin për pasigurinë që evoluoi nga këto sjellje dhe tha se deri dje, banorët e Groenlandës “nuk mund të përjashtonin asgjë”.
Në lidhje me një “marrëveshje të ardhshme” të njoftuar nga presidenti amerikan, Nielsen shprehu se çdo bisedë mbi bashkëpunimin do të zhvillohet vetëm në kuadër të respektit për sovranitetin dhe ligjin ndërkombëtar. Ministrja e Jashtme e Groenlandës, Vivian Motzfeldt, përshkroi zhvillimet në Forumin Ekonomik Botëror në Davos si “pozitive”, por nënvizoi se pasiguria vazhdon të mbizotërojë.
Së fundmi, presidenti amerikan, Donald Trump, tërhoqi kërcënimin për tarifa shtesë ndaj vendeve evropiane lidhur me Groenlandën, duke përjashtuar gjithashtu mundësinë e përdorimit të forcës për të pushtuar ishullin, i cili është pjesë e Mbretërisë së Danimarkës. Motsfeldt sqaroi se ajo dhe ministri danez i Mbrojtjes, Trolls Lund Poulsen, u takuan me Sekretarin e Përgjithshëm të NATO-s për të përcaktuar “vijat e kuqe” për të ruajtur sovranitetin dhe të drejtat e banorëve të Groenlandës.
Ajo potencoi se deri më tani nuk ka asnjë marrëveshje zyrtare lidhur me Groenlandën dhe se Qeveria e Groenlandës nuk ka kërkuar negociata nga NATO. “Ky është një lajm pozitiv nga Davosi,” përfundoi Motsfeldt.
