Blegtoria në Greqi po përballet me një krizë alarmante, për shkak të shpërthimit të dy sëmundjeve të rrezikshme, murtajës dhe lisë së dhenve e dhive, që kanë shkaktuar humbje masive bagëtish. Sëmundjet zoonoze kanë detyruar autoritetet të vendosin karantinë në disa zona, kryesisht në Thesali dhe Maqedoninë Lindore. Sipas Ministrisë së Bujqësisë, brenda 12 muajve janë therur mbi 300 mijë krerë bagëti të imta, me rreth 263 mijë viktima nga lija dhe 38 mijë nga murtaja. Vetëm gjatë 40 ditëve të fundit, humbjet nga lija kanë arritur në mbi 100 mijë krerë, duke përfaqësuar rreth 3.3% të tufës kombëtare.
Kjo situatë po kërcënon prodhimin e qumështit në vend, me fermerë që paralajmërojnë se nëse nuk ndërmerren masa urgjente, produkte themelore si kosi do të bëhen të papërballueshme deri në fund të dimrit. Industria e qumështit ka shprehur shqetësimin se përhapja e lisë rrezikon furnizimin me lëndë të parë për prodhimin e djathit feta, një nga produktet më të rëndësishme tradicionale të Greqisë.
Fermerët kanë paraqitur kërkesat e tyre për mbështetje ekonomike, kompensim të plotë për kafshët e humbura dhe masa të forta për të ndaluar përhapjen e sëmundjes. Aktualisht, dëmshpërblimi për kafshët e therura varion nga 250 deri në 500 euro për kokë, ndërsa deri tani janë ndarë mbi 30 milionë euro me pritshmëri për fonde shtesë. Në shenjë proteste, fermerët kanë paralajmëruar organizimin e protestave masive në Kardhicë, duke theksuar se kjo është një luftë për mbijetesë.
Zgjidhja për këtë krizë të thellë duket se është vaksinimi. Sidoqoftë, ekspertët theksojnë se situata është ndërlikuar nga fakti se virusi i lisë mund të mbijetojë për deri në gjashtë muaj në mjedis. Mungesa e kontrolleve kufitare dhe infrastruktura e papërshtatshme për menaxhimin e kafshëve të ngordhura ka kontribuar në shpërthimin e sëmundjes. Një bashkëpunim i ngushtë mes shtetit, pushtetit lokal dhe fermerëve është i domosdoshëm për të siguruar të ardhmen e blegtorisë dhe prodhimeve tradicionale në Greqi.
