Kriza e urisë në Gaza është përshkruar si “katastrofike” dy javë pas armëpushimit, sipas Agjencisë së Shëndetësisë së OKB-së. Organizatat humanitare kanë bërë thirrje për ndalimin e bllokimit të dërgesave humanitare nga Izraeli, pasi furnizimet aktuale nuk arrijnë të përmbushin nevojat ushqimore të popullsisë.
Programi Botëror i Ushqimit të OKB-së (WFP) ka deklaruar se dërgesat janë shumë më të ulëta se objektivi prej 2,000 tonësh në ditë, për shkak të hapjes së vetëm dy kalimeve kufitare. Tedros Adhanom Ghebreyesus, kreu i Organizatës Botërore të Shëndetësisë, theksoi se sasia e ushqimeve që hyjnë në Gaza është e pamjaftueshme dhe uria vazhdon të përkeqësohet.
Sipas të dhënave të OKB-së, një në katër banorë të Gazës po përballen me uri ekstreme, përfshirë më shumë se 11,500 gra shtatzëna. Ekspertët paralajmërojnë se kequshqyerja do të ketë ndikime afatgjata shëndetësore dhe sociale, sidomos për brezat e ardhshëm, ndëra çmimet e ushqimeve kanë shënuar rritje drastike.
Një grup prej 41 organizatash humanitare, përfshirë Oxfam dhe Këshillin Norvegjez për Refugjatët, ka denoncuar bllokimin e dërgesave, duke raportuar se 99 kërkesa për ndihmë nga organizatat ndërkombëtare janë refuzuar midis 10 dhe 21 tetorit. Gjykata Ndërkombëtare e Drejtësisë ka theksuar detyrimin e Izraelit për të siguruar nevojat themelore të popullsisë së Gazës, por organizatat humanitare përShkruajnë se ndihma është ende e pamjaftueshme dhe kërkojnë qasje më të madhe për shpërndarjen e saj.
Lufta në Gaza ka rezultuar me mbi 68 mijë viktima dhe më shumë se 170 mijë të plagosur, sipas autoriteteve palestineze. Ngjarjet e 7 tetorit, kur Hamas sulmoi Izraelin, lanë mbi 1,100 të vrarë dhe mbi 200 të tjerë të marrë robër. Situata vazhdon të jetë kritike, ndërsa nevoja për ndihma humanitare rritet dita ditës.
