Gjykata e Apelit ka ndërprerë masën e paraburgimit për pesë zyrtarë policorë, të dyshuar për “vrasje nga pakujdesia” të 27-vjeçarit Agon Zejnullahu. Avokati Besnik Berisha, mbrojtësi i njërit prej policëve të akuzuar, e përshkroi këtë proces si një betejë për të drejtat dhe ligjin, duke theksuar se nuk duhej lejuar që frika nga opinioni publik të zëvendësonte drejtësinë.
Më 9 korrik, Gjykata Themelore në Prishtinë, dega në Lipjan, kishte vendosur për paraburgimin e zyrtarëve për një muaj. Pas një ankesë, më 17 korrik, Apeli anuloi këtë aktvendim, por rasti u rikthye për rivendosje.Megjithatë, më 23 korrik, Gjykata Themelore përsëri vendosi që pesë policët të mbeteshin në paraburgim, ndaj palët mbrojtëse bënë ankesë të re në Apel.
Agon Zejnullahu vdiq në orët e para të 7 korrikut pas arrestimit nga policia në Lipjan. Policia ka deklaruar se ai ishte nën ndikimin e alkoolit dhe po sulmonte automjetet e kalimtarët kur u ndoq dhe u arrestua. Ndërkohë, familjarët dhe avokati i tyre pretendojnë se policia ka përdorur forcë të tepruar, një pikëpamje e mbështetur edhe nga disa përfaqësues të shoqërisë civile pas publikimit të disa videove në internet.
Pas këtij incidenti, komandanti i Policisë për rajonin e Lipjanit, Argjend Gashi, dha dorëheqje. Rasti ka sjellë reagime të shumta nga shoqëria, duke theksuar shqetësimet për përdorimin e dhunës nga policia.
