Kryetari i Partisë së Lirisë, Ilir Meta, ka reaguar pasi Kosova miratoi vendimin për ti dhënë 100 euro shtesë çdo pensionisti si dhe punonjësve të sektorit publik dhe studentëve, në kuadër të krizës ekonomike.
Përmes një postimi në “Facebook”, Meta shkruan se ndihma e qeverisë së kryeministrit Edi Rama për pensionistët nuk është as një kafe në ditë, teksa shtoi se për pensionistët në Shqipëri jetesa është e papërballueshme.
“Pas Maqedonisë së Veriut, edhe Qeveria e Kosovës ndërmerr hapa konkretë për të mbështetur shtresat në nevojë për përballimin e krizës së rritjes së çmimeve dhe inflacionit të lartë.
100 euro shtesë do të jetë shuma që do të përfitojnë pensionistët në Kosovë gjatë muajit tetor.
Po në Shqipëri? Ndihma e Qeverisë Rama për pensionistët nuk është as sa një kafe në ditë, sepse paratë ajo i shpërdoron dhe i vjedh për inceneratorët dhe koncensionet, ndërsa për pensionistët në Shqipëri jetesa është e papërballueshme”, shkruan Meta.
