Nga 12 tetori, Bashkimi Europian do të zbatoj sistemin e ri të hyrje-daljeve, Entry/Exit System (EES), i cili zëvendëson vulën tradicionale në pasaportë me kontrolle biometrike për udhëtarët nga jashtë BE-së, përfshirë Mbretërinë e Bashkuar.
Për fazën pilot, aeroportet e Milano Linate, Malpensa dhe Roma Fiumicino do të jenë të parat që do ta implementojnë këtë sistem, i cili do të zgjerohet edhe në portet e Civitavecchia dhe Gjenova, dhe pritet të përfshijë të gjitha pikat kufitare deri në prill 2026.
Ky sistem do të menaxhohet nga Policia e Kufirit dhe do të zëvendësojë vulosjen manuale me një regjistrim elektronik që do të përfshijë shenjën e gishtave, fotografinë dhe të dhënat personale të udhëtarëve. Qëllimi kryesor është rritja e sigurisë, kontrolli i qëndrimeve afatshkurtra (deri në 90 ditë brenda 180 ditëve) dhe parandalimi i imigracionit të paligjshëm.
Të dhënat do të ruhen në bazën qendrore eu-LISA, me seli në Estoni, e cila do të grumbullojë informacion nga 25 vende të zonës Schengen, si dhe nga Islanda, Lihtenshtajni, Norvegjia dhe Zvicra. Gjatë fazës së parë, rreth 10% e udhëtarëve në pikat e jashtme kufitare do t’i nënshtrohen kontrolleve biometrike, përpara se procedura të bëhet plotësisht funksionale në vitin 2026.
Udhëtarët do të kenë mundësinë të përfundojnë një pjesë të procedurës përmes kioska vetëshërbimi ose aplikacioneve digitale. Fëmijët nën 12 vjeç do të përjashtohen nga regjistrimi i gjurmëve të gishtave. Sipas Komisionit Europian, EES përbën “një hap të madh drejt një Evrope më të sigurt dhe më të digjitalizuar”, duke modernizuar mënyrën se si monitorohen hyrjet dhe daljet në kufijtë e kontinentit.
Në kufirin mes Shqipërisë dhe Greqisë, pajisjet për këtë sistem janë duke u vendosur dhe pritet që ky proces të sjellë radhë të shtuara.
