Në orët e mëngjesit, forcat operacionale të Drejtorisë së Përgjithshme të Burgjeve realizuan një kontroll të befasishëm në Institucionin e Ekzekutimit të Vendimeve Penale (IEVP) Durrës. Gjatë këtij kontrolli, u zbuluan pesë aparate telefoni celular të markës iPhone, të cilët përbëjnë sende të ndaluara për ambientet e institucionit.
Aparatet ishin të fshehura në dyert e dusheve, brenda ambientit të përbashkët në Godinën “A”, në katin e tretë, Sektori 1. Dyshohet se këto telefona u takonin të dënuarve me inicialet F. K., A. P., dhe V. I. Ndërkohë, institucionet kompetente kanë nisur një hetim për të zbuluar plotësisht personat përgjegjës dhe mënyrën se si këto sende ndaluara arritën brenda institucionit.
Ky incident vjen si një kujtesë për seriozitetin e situatës në burgje dhe sfidat që lidhen me sigurinë e tyre. Autoritetet po punojnë për të parandaluar raste të ngjashme në të ardhmen dhe për të forcuar standartet e sigurisë.
