Autoritetet italiane kanë zbatuar një mandat arresti ndërkombëtar nga Shtetet e Bashkuara të Amerikës duke vënë në pranga 5 rusë, mes tyre Artem Uss një biznesmen është djali i guvernatorit të Krasnoyarsk.
Të arrestuarit akuzohen se kanë krijuar një mekanizëm kompleks financiar për të siguruar teknologji ushtarake dhe naftë nga Venezuela. Arrestimi ndodhi në aeroportin e Malpensas në Milano. Artem Uss dhe 4 qytetarët rusë akuzohen për shmangie sanksionesh dhe pastrim parash. Arrestimi konfirmohet nga ambasada ruse në Facebook.
“Furnizimi me produkte të naftës, mjeteve teknike, të shitura lirshëm në gjithë botën, bëhet papritur ilegal nga autoritetet amerikane. Pse? Vetëm sepse bëhet për të mirën e Rusisë. Konotacioni politik i këtyre akuzave është padyshim i qartë”, shkruante në Telegram guvernatori, Alexandër Uss.
Shtatë persona janë në shënjestër të Shteteve të Bashkuara, përveç pesë shtetasve rusë, ka edhe dy tregtarë venezuelianë të naftës dhe të gjithë akuzohen për shmangie të sanksioneve dhe pastrim parash. Dymbëdhjetë akuza rëndojnë kundër rusëve Yury Orekhov, Artem Uss, Svetlana Kuzurgasheva, Timofey Telegin dhe Sergey Tulyakov dhe tregtarëve venezuelanë të naftës Juan Fernando Serrano Ponce dhe Juan Carlos Soto. Sipas hetuesve amerikanë, të pandehurit janë të përfshirë në “orkestrimin e një sistemi kompleks për të marrë në mënyrë të paligjshme teknologjinë ushtarake amerikane dhe naftën e sanksionuar nga Venezuela”.
Sipas Departamentit Amerikan të Drejtësisë, Orekhov dhe Uss u arrestuan përkatësisht në Gjermani dhe Itali më 17 tetor dhe do t’i nënshtrohen procedurës së ekstradimit. Nëse shpallen fajtorë, të pandehurit përballen me një maksimum prej 30 vitesh burg. Administrata amerikane ka zgjeruar listën e sanksioneve anti-ruse, duke shtuar një shtetas rus dhe dy kompani të lidhura me bazë në Gjermani dhe Emiratet e Bashkuara Arabe, tha Departamenti Amerikan i Thesarit.
