Administrata Trump po përballet me thirrje për një angazhim më të madh në Ballkanin Perëndimor. Kjo kërkesë u shpreh gjatë një diskutimi në Komitetin për Politikë të Jashtme të Dhomës së Përfaqësuesve, ku pjesëmarrësit nënvizuan se një angazhim i tillë do të kontribuonte në stabilizimin e një rajoni që po përballet me ndikimin destabilizues të Rusisë, e cila, sipas tyre, vepron përmes Serbisë.
Kryetari republikan i Nënkomitetit për Europën, Keith Self, e përshkroi Ballkanin si “rajonin më të paqëndrueshëm në Europë” përveç Ukrainës, që aktualisht është nën pushtim rus. Një nga çështjet kryesore që shkakton paqëndrueshmëri është marrëdhënia e pazgjidhur mes Kosovës dhe Serbisë, që e favorizon Rusinë në përpjekjet për të destabilizuar Bashkimin Europian dhe për të minuar fuqinë e NATO-s në rajon.
Self theksoi se në rast konflikti, aleatët e NATO-s si Shqipëria, Maqedonia e Veriut dhe Mali i Zi do të ishin nën kërcënim të drejtpërdrejtë, duke potencuar se këtë situatë mund ta aktivizojë nenin 5 të Aleancës, ku një sulm ndaj njërit anëtar mund të përkthehet si sulm ndaj të gjithëve. Ai vuri në dukje se është e rëndësishme që këta aleatë të krijojnë një barrierë politike dhe ushtarake, duke tërhequr vëmendjen se Kosova është veçanërisht e ekspozuar, pasi nuk është pjesë e aleancës ushtarake.
Në këtë kontekst, Self argumentoi se kundërshtarët e SHBA-së po shfrytëzojnë dobësitë në rajon për të zhvilluar luftra hibride, duke rritur kështu paqëndrueshmërinë. Ai gjithashtu theksoi se Kina po përpiqet të forcojë ndikimin e saj në Ballkan përmes stërvitjeve ushtarake dhe dërgimit të armëve në Serbi, duke e bërë situatën edhe më të komplikuar.
Në këtë perspektivë, thirrjet për një angazhim më të madh të SHBA-së në Ballkanin Perëndimor bëhen gjithnjë e më urgjente.
