Vendburimet e hidrokarbureve në Shqipëri kanë një histori aspak të lavdishme, sidomos pas viteve ’90, ku shumica e tyre u dha me koncesion te disa firma private, të cilat i kanë zhvatur sa kanë mundur dhe duke i lënë më pas rrënoja. Madje, edhe koncesionarët e mëdhenj, ata që administrojnë Patos-Marinzën dalin gjithmonë me humbje, nje skemë e përdorur rëndom për të mos paguar taksa apo dividentë.
Ndërkohë, shoqëria shtetërore e hidrokarbureve, Albpetrol, duhet që të kishte rolin e një kontrollori për të gjetur dhe denoncuar abuzimet, por historia e ka treguar se zyrtarët e saj kanë qenë lidhur ngushtë me vetë firmat private. Madje, disa ish-drejtorë janë bërë biznesmenë të mëdhenj, ndërkohë që vendburimet kalojnë nga njëra dorë në tjetrën, kjo me qëllim humbjen e gjurmëve.
Skandalet vijojnë të ndodhin edhe në ditët apo javët e fundit, sa në zyrat e Albpetrolit në Tiranë ashtu edhe në zyrat e Patosit. Në këto radhë, redaksia e Vox News ka faktuar një tjetër rast të dyshimtë të një konflikti të pastër interesi. Një firmë koncesionare që ka marrë nga vetë shteti disa vendburime, ka fituar një tender po nga Albpetroli. Madje, kjo firma koncesionare duhet të bëjë një punë që duhet ta kishte bërë një ish-firmë koncesionare, që pasi shfrytëzoi vendburimin e la të shkatërruar.
Faksimile: Vendimi i Këshillit të Ministrave për marrëveshjen për vendburimin e gazit natyror Frakull
Tre vite më parë, në datën 9 qershor 2022, Këshilli i Ministrave miratoi një marrëveshje hidrokarburesh mes kompanisë shtetërore Albpetrol dhe firmës EDG, në pronësi mazhorance të z. Sokol Meqemeja. Ky biznesmen, përveç Frakullës, shfrytëzon edhe vendburimin e gazit në Delvinë.
Sipas dokumenteve që disponon Vox News, VKM mban numrin 401 dhe me titull “Për miratimin e marrëveshjes Hidrokarbureve me ndarje prodhimi për Zhvillimin dhe prodhimin e hidrokarbureve në vendburimin e gazit natyror Frakull, ndërmjet Albpetrol dhe EDG Naryral Gas”.
Në të njëjtën ditë, qeveria ka miratuar marrëveshjen mes Albpetrolit dhe firmës EDG edhe për vendburimin e gazit natyror Povelçë- Fier.
Faksimile: Njoftimi i fituesit të tenderit të Albpetrolit për rregullimin e një pusi
Dokumenti më sipër është njoftimi i fituesit i kompanisë shtetërore Albpetrol të një tenderi. Fitues ka dalë firma EDG Service. Objekti i tenderit është “eleminimi i avarisë në pusin CA-58”.
“Me anë të këtij formulari ju informojmë se, në këtë procedurë ka marrë pjesë operatori ekonomik ‘EDG SERVICE’, firmë e cila ka ofruar për këtë tender vlerën ekonomike në total 32,410,000 lekë pa TVSH” thuhet në dokumente. Pra, ka qenë vetëm një firmë në garë e cila normalisht doli fituese.
Faksimile: Pronari i firmës EDG SERVICE është z. Sokol Meqemeja
Vox News shfletoi dokumente nga Qendra Kombëtare e Biznesit, ku rezulton se fituesi i tenderit për rregullimin e pusit “CA-58”, është firma EDG dhe me pronar z. Sokol Meqemeja.
I njëjti pronar ka fituar edhe koncesione në Frakull, Povelçë dhe Delvinë, ndërkohë që del fitues të një tjetër tenderi të shpallur po nga Albpetrol.
Faksimile: Pusi që do të rregullojë EDG është lënë i prishur nga ish-firma koncesionare Stream Oil
Por, çfarë do të rregullojë firma EDG?!
Në dokumente shkruhet se shoqëria “Albpetrol” ka nën administrim vendburime për nxjerrjen e naftës dhe gazit. “Procedurat e remontit nëntokësor në puset e pjesës më të madhe të këtyre vendburimeve shoqëria i kryen me mjetet e saj (traktorë pastrimi, Autosonda diessel, autosonda elektrike, autongritës elektrik etj.).
Në vendburimin Cakran-Mollaj ndodhet pusi CA-58, i cili është në avari të rëndë prej muajit gusht 2014, kur vendburimi Cakran-Mollaj ka qënë nën administrimin e kompanisë Stream Oil&Gas. Natyra e avarisë është se ka mbetur i kunjosur (Packer) në thellësinë H = 2458.8 m duke bllokuar komunikimin shtresë-pus dhe duke e nxjerrë jashtë funksioni pusin. Punimet e fundit të kyera në pus për eliminimin e avarisë datojnë në periudhën nga data 08.06.2017 deri më datë 05.01.2018 duke harxhuar më shumë se 350 orë punime me autosondë ≥ 70 Ton por pa rezultat sepse pusi vazhdon të jetë i bllokuar” shkruhet në këto dokumente.
Pra, një koncesionar do të rregullojë avarinë e lënë përgjysme nga një ish-koncesionar. A mos është kjo një manovër e Albpetrol për ti kaluar më pas Meqemes, vendburimin Cakran-Mollaj?!
©CopyrightVoxNews
