Koncerti “Violinat e Shpresës”, që përfshin instrumente muzikore artefakte nga kampet e përqendrimit gjatë Holokaustit, planifikohet të mbahet në Shqipëri vitin e ardhshëm. Njoftimi erdhi gjatë takimit mes ministrit të Turizmit, Kulturës dhe Sportit dhe maestro Shlomo Mintz, një violinist dhe dirigjent i njohur në skenën muzikore ndërkombëtare, i cili ka bashkëpunuar me disa nga orkestrat dhe dirigjentët më të njohur globalisht.
Gjatë takimit, ata diskutuan për mundësitë e organizimit të këtij eventi të rëndësishëm, i cili ka vizituar qytete të njohura si Paris, Jerusalem, Sion, Madrid, Charlotte, Monte-Karlo, Romë, Cleveland, Meksiko Siti, Sarasota dhe Buenos Aires. Projekti përfshin gjithashtu një ekspozitë me mbi 40 instrumente dhe historitë e tyre individuale, e cila ka qenë e pranishme në vendndodhje të tjera të njohura, përfshirë Muzeun Maltz të Trashëgimisë Hebraike në Cleveland dhe Filarmoninë e Berlinit.
Ministri njoftoi se gjatë diskutimit, u trajtuan ide dhe nisma të tjera që mund të kontribuojnë në pasurimin e jetës kulturore të vendit, veçanërisht për brezat e rinj të muzikantëve. Mes këtyre nismave është edhe mundësia për të ofruar masterkurse dhe programe që do të përfitojnë nga përvoja e gjerë të maestro Mintz si themelues dhe drejtues artistik, si dhe si anëtar gjyqësor në konkurse ndërkombëtare.
Ky projekt vjen si një mundësi për të shpërndarë mesazhin e shpresës dhe kujtimit nëpërmjet muzikës, duke lidhur të kaluarën me të tashmen dhe duke frymëzuar të rinjtë në fushën e arteve. Prania e këtij eventi do të ndihmojë gjithashtu në promovimin e kulturës muzikore në Shqipëri, duke sjellë një pjesë të historisë dhe trashëgimisë kulturore për publikun shqiptar.
