Federata Shqiptare e Futbollit ka njoftuar një investim të rëndësishëm në infrastrukturën sportive, duke planifikuar ndërtimin e një hoteli modern pranë kompleksit “Shtëpia e Futbollit”. Ky hotel do të ofrojë akomodim për skuadrat kombëtare gjatë grumbullimeve të tyre, duke përfshirë Kombëtaren A për djem dhe vajza, si dhe skuadrat e ndryshme të moshave.
Projekti parashikon një strukturë me pesë kate mbi tokë dhe dy nën tokë, e cila do të përmbajë 87 dhoma. Përveç akomodimit, hoteli do të ketë ambiente funksionale si restorante dhe salla konferencash. Kapaciteti i hotelit do t’i lejojë akomodimin e deri në katër ekipeve kombëtare në të njëjtën kohë, sidomos gjatë turneve.
Ndër të tjera, hoteli do të përfshijë një kat për parkimin, si dhe mundësi për aktivitete të tjera si pishina dhe palestra. Federata Shqiptare e Futbollit ka bërë të ditur se ka aplikuar për lejen e ndërtimit dhe, sapo kjo të miratohet, do të fillojnë punimet.
Ky investim ka si qëllim krijimin e kushteve optimale për skuadrat kombëtare dhe zhvillimin e mëtejshëm të kompleksit “Shtëpia e Futbollit”.
