Këshilli Bashkiak i Tiranës ka kërkuar zyrtarisht nga Prokuroria e Posaçme (SPAK) dhe Drejtoria e Përgjithshme e Burgjeve lejen për kryebashkiakun Erion Veliaj të marrë pjesë fizikisht në mbledhjet për konsultimin dhe detalizimin e projektbuxhetit për vitin 2026. Sipas kërkesës, pjesëmarrja e tij është një detyrim ligjor që garanton bashkëpunimin me këshillin për çështje të rëndësishme për publikun.
Në dokumentin e dërguar, Këshilli thekson se prania e Veliajt është e domosdoshme për të siguruar një funksionim të rregullt institucional. Kërkesa përfshin detaje specifike, si referencën në kërkesën e Veliajt për të marrë pjesë në konsultimin e PBA 2026-2028 dhe si ai ka të drejtë të paraqesë projektbuxhetin për miratimin e Këshillit, sipas Ligjit për Vetëqeverisjen Vendore.
Konkretisht, Neni 58 pika 4 i Ligjit nr.139/2015 e lejon kryebashkiakun të marrë pjesë në mbledhjet e Këshillit dhe të raportojë. Ndërsa Neni 60 përcakton se bashkëpunimi ndërmjet Kryetarit të Bashkisë dhe Këshillit është i detyrueshëm për çështje të interesit publik.
Pjesëmarrja e Kryetarit është parashikuar gjithashtu nga Legjislacioni për Financat e Qeverisjes Vendore, i cili e bën të qartë se Kryetari përgatit projektbuxhetin dhe e paraqet atë për miratim. Në këtë kontekst, Këshilli Bashkiak kërkon që, nëse Veliaj ka masa kufizuese ndaj tij, të vlerësohet mundësia e një leje të përkohshme për pjesëmarrje fizike në datat 16 deri në 18 dhjetor 2025.
Këshilli ka shprehur gatishmërinë për të bashkëpunuar me çdo kërkesë sigurie, protokolli apo logjistike nga institucionet përkatëse, me qëllim që procesi të jetë ligjor, transparent dhe funksional. Ata kërkojnë një informacion me shkrim mbi vendimmarrjen e institucioneve të përfshira, duke theksuar rëndësinë e respektimit të funksioneve institucionale dhe të të drejtës së Kryetarit për të raportuar para Këshillit Bashkiak.
