TIRANA- Demokrati Gjin Gjoni ka paraqitur në Komisionin për Çështjet Ligjore dhe Administratën Publike kërkesën për shkarkimin nga detyra të Presidentit të Republikës, Bajram Begaj, duke e akuzuar atë për “shkelje të vazhdueshme dhe të rënda të Kushtetutës”. Në dokumentin e paraqitur nga Gjoni, ndër shkeljet e pretenduara renditen dekretimi i zgjedhjeve të pjesshme për Bashkinë e Tiranës dhe ndërhyrja në pavarësinë e Gjykatës Kushtetuese.
“Grupi i PD ka paraqitur kërkesën për fillimin e procedurës për shkarkimin e Presidentit Bajram Begaj për shkelje të rëndë dhe në mënyrë të vazhdueshme. Kërkesa është argumentuar gjërësisht me një material prej 80 faqesh të mbështetur me 21 prova shkresore. Jemi të bindur që Bajram Begaj nuk mund të vazhdojë të jetë de juro kryetar i shtetit, funksione që de facto i ka humbur prej shumë kohësh tashmë,” tha Gjoni.
Sipas tij, veprimet e Presidentit nuk kanë pasur qëllim legjitim, por janë ndërmarrë për të shërbyer interesave të qeverisë, duke ndikuar negativisht në funksionimin e institucioneve dhe proceset demokratike. Gjoni ka ngritur gjithashtu pretendime se Presidenti Begaj është i punësuar në një spital privat, ndërsa djali i tij punon në një kompani sigurimesh private.
7 shkeljet që opozita pretendon se janë kryer nga presidenti Bajram Begaj:
-Dekretoi zgjedhje në Tiranë në shkelje të Kushtetutës;
-Ndërhyri në mandatin e anëtarëve të Gjykatës Kushtetuese, i preku pavarësinë;
-Dekretoi në shkelje ligjin për Komisionet Hetimore;
-Dekretoi ministren virtuale ‘Diella’;
-S’ndali trupën diplomatike nga përfshirja në fushatën e vitit 2025;
-Kabineti i tij ndërhyri në procesin e administrimit të zgjedhjeve;
-I biri i punësuar fiktivisht në një kompani private sigurimesh që përfiton tendera nga presidenca/ Vetë Begaj i punësuar në një klinikë private.
