Pas samitit në Alaskë, optimizmi për një përparim në diplomacinë lidhur me luftën në Ukrainë ka rënë. Zëvendësministri i Jashtëm rus, Sergei Ryabkov, theksoi se “momentumi i fortë” për një marrëveshje është shteruar, duke i vënë fajin veprimeve shkatërruese të vendeve evropiane që sipas tij, pengojnë përpjekjet për paqe.
Deklarata e Ryabkov vjen në një kohë kur në Uashington po diskutohet dërgimi i raketave Tomahawk në Ukrainë, armë këto që mund të godasin objekte strategjike deri në 2,500 kilometra larg. Ai e cilësoi këtë një hap shumë të rrezikshëm, duke theksuar se përdorimi i këtyre sistemeve do të kërkonte përfshirjen e drejtpërdrejtë të personelit amerikan.
Në zhvillime të tjera, Presidenti ukrainas Volodymyr Zelensky njoftoi se ushtria ruse ka marrë urdhra për të sulmuar pozitat ukrainase në Pokrovsk, Donetsk dhe Donbas, duke e përmendur situatën e vështirë që po kalon Rusia në front, me humbje të konsiderueshme.
Inteligjenca ukrainase gjithashtu raportoi se sanksionet ndërkombëtare kanë sjellë një krizë në sektorin ajror rus, duke parashikuar se qindra avionë mund të dalin jashtë përdorimit deri në vitin 2030, pasi nuk ka pjesë për këmbim dhe mirëmbajtje.
Tensionet mbeten të larta në terren dhe në bisedimet diplomatike. Vendimet e pritura në Uashington dhe Bruksel në javët e ardhshme do të jenë vendimtare për të përcaktuar nëse konflikti do të thellohet, apo nëse do të ketë hapësira për një zgjidhje paqësore.
