Ylli në ngritje i muzikës latine, DELAROSA, ka humbur jetën pas një sulmi me armë zjarri në Northridge, Los Angeles. Ngjarja ndodhi rreth orës 1:30 të mëngjesit të së shtunës, kur persona të armatosur i janë afruar një automjeti të parkuar dhe kanë hapur zjarr ndaj pasagjerëve. Policia e Los Angelesit identifikoi 22-vjeçaren Maria De La Rosa, emri artistik i së cilës është DELAROSA, si viktimën fatale.
Dëshmitarët raportuan se dy burra iu afruan automjetit dhe filluan të qëllonin me armë. Tre persona ishin në makinë në momentin e sulmit dhe të gjithë u goditën, ndërsa DELAROSA u dërgua me urgjencë në spital, ku mjekët nuk arritën ta shpëtonin. Dy personat e tjerë që ishin me të mbijetuan, por ndodhen në gjendje kritike.
Ngjarja ndodhi në një lagje përndryshe të qetë, që ka ngritur shqetësime mbi sigurinë dhe aktivitetet e mundshme të bandave në zonë. Policia nuk ka realizuar ende arrestime dhe hetuesit po punojnë për të zbuluar motivin e sulmit. Ndërkohë, infomaacione të tjera mbi rrethanat e ngjarjes ende mungojnë.
DELAROSA ishte një artist me një numër në rritje fansash në Instagram, mbi 40,000, dhe sapo kishte nisur karrierën e saj në muzikën latine, duke publikuar këngën e saj “No Me Llames” në gusht. Ngjarja ka shkaktuar tronditje në komunitetin e muzikës dhe te adhuruesit e saj, që kanë ndjerë humbjen e një talenti të ri dhe të ndritshëm.
