Interesimi në rritje për Myrto Uzunin ka sjellë jo pak shqetësim te tifozët e Granadës, të cilët shohin se si shumë klube janë të gatshëm të afrojnë sulmuesin e kombëtares shqiptare, i cili u shpall golashënuesi më i mirë i La Liga 2 në edicionin e kaluar.
Edhe pse ai nisi mbrëmë edicionin me Granadën duke u aktivizuar ndaj Atletiko Madrid, në klub e shohin ende të mundshëm largimin e tij, siç konfirmoi drejtori i përgjithshëm i klubit, Alfredo Garcia Amado para ndeshjes. Uzuni ka rinovuar në tetor kontratën e tij me Granadan dhe i është vënë një klauzolë largumi prej 25 milionë eurosh. Pikërisht kjo është shifra që do i kërkohet kujtdo që interesohet për sulmuesin.
“Ai ishte golashënuesi më i mirë dhe të gjithë ekipeve që na pyesin për të, ne i kemi treguar klauzolën e largimit, prej 25 milionë eurosh, pasi nuk kemi ndër mend ta shesim për më pak”, tha Amado, duke bërë të qartë se për atë shifër, Uzuni mund t’i jepte lamtumirën klubit të La Liga.
Mediat spanjolle kanë bërë të ditur se Sauthempton në Angli, Reims në Francë dhe dy klube nga Arabia Saudite po interesohen aktualisht për sulmuesin.
