Agjencia Kombëtare e Ujësjellës-Kanalizimeve (UKV) ka reaguar ndaj situatës së rëndë që po kalojnë banorët e Vlorës, të cilët për katër ditë rresht janë pa furnizim me ujë. Në një komunikim për Top Channel, UKV përmendi se po punohet për të adresuar problemin dhe se pritet që sot, në orën 17:00, të mbërrijnë materiale të nevojshme nga Stambolli dhe Italia për të rregulluar linjën e tubacionit.
Sipas UKV-së, incidenti ndodhi më datë 25, dhe pas një verifikimi të menjëhershëm, u vendos që ndërhyrjet të realizoheshin një ditë më vonë për shkak të terrenit të vështirë. Në këtë kontekst, janë instaluar dy pajisje për të zgjidhur problemin, por tentativa e ndërrimit nuk arriti sukses dy herë.
Agjencia shprehu optimizmin se me ndihmën e materialeve që do të mbërrijnë, do të bëhet një ndërhyrje e re për zgjidhjen e situatës. “Materialet janë specifike dhe me ndihmën e Zotit, presim që të përfundojmë punën deri në darkë”, theksoi UKV. Sipas tyre, problemi i ujit ishte i lidhur me tubacionin kryesor, dhe mbërritja e materialeve do të jetë thelbësore për rikthimin e furnizimit me ujë për qytetarët.
Kjo situatë ka shkaktuar shqetësim tek banorët e Vlorës, të cilët shpresojnë që problemi të zgjidhet sa më shpejt. UKV e ka premtuar një përditësim të mëtejshëm për qytetarët pas përfundimit të punimeve.
