Qeveria e Venezuelës deklaroi se bllokada detare shpallur nga Shtetet e Bashkuara nuk ka pasur ndikim në eksportet e naftës deri më tani. Presidenti Nicolas Maduro e quajti këtë veprim një “kërcënim” për sovranitetin dhe ligjin ndërkombëtar. Kompania shtetërorë e naftës PdVSA, siguroi se aktivitetet e saj vazhdojnë normalisht, me anije që lundrojnë pa probleme.
Bllokada e shpallur nga Presidenti amerikan Donald Trump synon të pakësojë të ardhurat e Venezuelës, ndërsa ai ka urdhëruar përqendrimin e trupave ushtarake në Karaibe. OKB ka bërë thirrje për shmangien e përshkallëzimeve të reja. Gjatë komunikimit të tij me Sekretarin e Përgjithshëm të OKB-së, Antonio Guterres, Maduro e denoncoi pretendimin e Trumpit se nafta dhe territorët e Venezuelës i përkasin Shteteve të Bashkuara.
Trump pretendoi se qeveria venezueliane po përdor të ardhurat nga nafta për të mbështetur aktivitete të paligjshme, por nuk ofroi prova për akuzat e tij, duke iu referuar veprimeve të mëparshme të shtetëzimit të industrisë së naftës në vitet ’70. Maduro kërkoi që Kombet e Bashkuara të refuzonin kategorikisht këto deklarata, duke theksuar se ato rrezikojnë paqen rajonale.
Ushtria amerikane, që ka realizuar sulme mbi anije për të luftuar trafikun e drogës, vazhdon operacionet e saj mes akuzave nga Trump. Ministri i Mbrojtjes i Venezuelës, Vladimir Padrino, theksoi se ushtria nuk frikësohet nga kërcënimet amerikane dhe se një sulm kundër Venezuelës do të ndalonte çdo sasi nafte të dalë nga vendi.
Venezuela, e cila ka qenë nën embargo për naftën që nga viti 2019, është detyruar të shesë në tregun e zi me çmime më të ulëta, me shumicën e eksportit që i drejtohet Kinës. Kina ka shprehur kundërshtim ndaj përpjekjeve për shtrëngim të njëanshëm dhe mbështetje për çdo vend që mbron sovranitetin e tij.
