Pas një sulmi kibernetik që ndodhi të shtunën, pasagjerët në aeroportet më të mëdha të Europës po përballen me vështirësi të mëdha. Aeroporti i Brukselit njoftoi se gjysma e fluturimeve të planifikuara për ditën e diel do të anulohen për shkak të një ndërprerjeje të vazhdueshme në sistemin e regjistrimit elektronik. Zëdhënësi i aeroportit kërkoi nga linjat ajrore që të anulonin 50% të fluturimeve për të shmangur radhët e gjata dhe vonesat e mëtejshme.
Eurocontrol, agjencia që menaxhon trafikun ajror në Evropë, gjithashtu këshilloi linjat ajrore të reduktonin fluturimet për në dhe nga Brukseli deri të hënën. Sulmi preku gjithashtu aeroportin Heathrow në Londër, i cili raportoi vonesa për shkak të një “problemi teknik” në sistemet e regjistrimit, si dhe aeroportin Brandenburg të Berlinit, ku u raportuan pritje të gjata.
Kompania RTX, që zotëron Collins Aerospace dhe sistemin Muse të prekur nga sulmi, e konfirmoi ndërprerjen si të lidhur me një sulm kibernetik që ka ndikuar aeroporte të veçanta. Muse është një sistem i përdorur nga linjat ajrore për regjistrimin e pasagjerëve dhe dorëzimin e bagazheve.
Ndërkohë, British Airways në Heathrow u kalua në një sistem rezervë dhe po operon normalisht, megjithatë shumica e linjave të tjera janë prekur rëndë. Komisioni Evropian po monitoron situatën, por nuk ka dhenë shenja të një kërcënimi më të gjerë.
Ndërsa qindra fluturime u vonuan në të gjithë Europën, aeroportet në Irlandë raportuan një ndikim të vogël, me disa linja ajrore që kaluan në regjistrim manual. Disa aeroporte përballen edhe me incidente të veçanta, si evakuimi i Terminalit 2 në Dublim për një alarm sigurie.
Analistët e sigurisë kibernetike nënvizojnë dobësinë e industrisë së aviacionit ndaj kërcënimeve dixhitale. Ka dyshime për hakerë të lidhur me Moskën, por ekspertët sugjerojnë se shumica e sulmeve vijnë nga grupe kriminale që kërkojnë përfitime financiare. Hetimet për këtë incidente janë ende në vazhdim.
