Kandidati demokrat për Senatin amerikan në Maine, Graham Platner, ka kërkuar falje publikisht dhe ka hequr një tatuazh që i ngjante një simboli nazist, pas reagimeve të ashpra në rrjetet sociale dhe dorëheqjes së stafit të tij politik. Platner, një veteran i Marinës amerikane, shprehu se nuk ishte në dijeni që tatuazhi me kafkë dhe kocka të kryqëzuara kishte ngjashmëri me simbolin nazist Totenkopf, i përdorur nga forcat SS gjatë Luftës së Dytë Botërore.
Platner u shpreh për BBC se “absolutisht nuk do ta kisha pasur këtë në trup nëse do ta dija se çfarë përfaqësonte” dhe njoftoi se e kishte mbuluar tatuazhin me një dizajn të ri. Tatuazhi u bë i njohur nga një video virale ku Platner shihej duke kërcyer në dasmën e vëllait të tij me të brendshme. Pas publikimit të videos, ish-drejtoresha e tij politike, Genevieve McDonald, dha dorëheqjen duke e cilësuar tatuazhin si “antisemit” dhe “të papranueshëm”.
Platner ka treguar se ia kishte bërë tatuazhin në Kroaci në vitin 2007, gjatë shërbimit të tij në ushtri, dhe se e kishte zgjedhur në mënyrë spontane gjatë një mbrëmjeje, duke thënë se ishte “një zgjedhje e çastit” pa ndonjë ide për përfshirjen e tij në simbole historike naziste. Ai e përshkroi dizajnin si “tmerrues”.
Ekipi i tij fushatës theksoi se tatuazhi ishte verifikuar nga mjekët ushtarakë në të kaluarën dhe nuk kishin ngritur shqetësime, duke përmendur se ushtria ndalon tatuazhet me simbole urrejtjeje. Platner tani përballet me një situatë të vështirë në kuadër të fushatës së tij, pas këtyre zhvillimeve të papritura.
