Luciano Spalletti ka shpallur interesin e tij për një rikthim në Serie A, konkretisht në stolin e Juventusit. Gjatë një aktiviteti në Milano, ai komentoi thashethemet që e lidhin me “Zonjën e Vjetër”, duke pohuar se dëshiron të kthehet, ndonëse nuk ka pasur ende kontakte me ekipet italiane.
Ish-trajneri i kombëtares italiane, 65-vjeçar, tha: “Kam ambicien të kompensoj atë që më ndodhi së fundmi me kombëtaren. Pres me qetësi se çfarë do të ndodhë.” Pavarësisht përpjekjeve për të shmangur spekulimet, ai është kandidat kryesor për të zëvendësuar Igor Tudorin, i cili është shkarkuar nga posti.
Spalletti shprehu respekt për Tudorin, duke e cilësuar si një person serioz dhe vlerash. Ai theksoi se kushdo që e zëvendëson do të përballet me një skuadër të mirë. Megjithatë, burime brenda klubit kanë konfirmuar se sot është planifikuar një takim midis drejtuesve të Juventusit dhe Spallettit, ku do të diskutohet një ofertë për një kontratë deri në qershor me opsion për rinovim nëse skuadra arrin në Ligën e Kampionëve.
Preferenca e Juventusit është një marrëveshje njëvjeçare, ndërsa Spalletti dëshiron një kontratë dyvjeçare. Drejtuesit e klubit në Torino po tregohen të kujdesshëm për të shmangur angazhime afatgjata që mund të dëmtojnë financiarisht klubin, pas përvojave të mëparshme.
Pas një periudhe me Napolin dhe zhgënjimit me kombëtaren, Spalletti kishte shfaqur dëshirën për të mos drejtuar më në Itali. Megjithatë, mundësia për t’u bërë trajner i Juventusit duket se ka ndikuar në ndryshimin e tij të mendimit. Ky pozicion për të do të përfaqsonte kulmin e një karriere të spikatur, që përfshin trajnimet e suksesshme me skuadra të njohura si Roma, Interi dhe Napoli.
Ai vlerëson strukturën dhe potencialin e Juventusit, duke besuar se mund të rikthejë ambicien e klubit në nivele më të larta dhe të konkurrojë për një vend në Ligën e Kampionëve. Gjithashtu, Spalletti dërgoi një urim për Gennaro Gattuson, pasardhësin e tij në stolin e Italisë, duke shpresuar që ai do të jetë në stolin e kombëtares në Kupën e Botës.
