Edon Zhegrova pritet të startojë si titullar në ndeshjen e sotme mes Juventusit dhe Pafos në Ligën e Kampioneve, një vendim që u konfirmua nga trajneri Spalletti gjatë një konference për shtyp. Kjo do të jetë hera e parë që Zhegrova luan nga minuta e parë për Juventusin, pas një periudhe të vështirë që përfshinte shumë minuta si zëvendësues në ndeshje të ndryshme.
Në total, Zhegrova ka grumbulluar vetëm 100 minuta aktivizim me ekipin bardhezi, duke arritur maksimumin prej 26 minutash në një ndeshje me Atalantën. Mungesa e tij gjatë pjesës së dytë të sezonit të kaluar për shkak të një problemi në aduktor dhe mbërritja e tij në Juventus në ditën e fundit të merkatos, në një gjendje fizike jo optimale, kishin penguar aktivizimin e tij.
Spalletti e ka shmangur riskun me Zhegrova, por me ndeshjen e sotme ai mund të kthehet si titullar pas një viti. Ndeshja e fundit si titullar për të daton më 14 dhjetor 2024 në Ligue 1, përkatësisht ndaj Olympique Marseille, ku luajti vetëm në pjesën e parë.
Një performancë e mirë nga Zhegrova sot mund të rrisë besimin e Spallettit në të, duke i dhënë mundësinë të ‘kërcënojë’ vendin e Conceiçaos. Vlen të theksohet që në nëntor 2024, ai ishte protagonist me një asist ndaj Jonathan David në një ndeshje të Ligës së Kampioneve, dhe tani ka mundësinë të rikthejë këtë sukses në fushën e lojës.
Me këtë ndeshje, Zhegrova ka mundësinë të kontribuojë për Juventusin e të ndihmojë David përsëri, siç bënë në kohët e Lille, duke shpresuar për një mundësi të shkëlqyer për të dëshmuar vlerat e tij si lojtar.
