Ish-trajneri i Liverpool-it, Jurgen Klopp, ka bërë një rikthim në fushën e futbollit, duke u bashkuar me Ligën Gjermane të Futbollit (DFL) në një rol të ri jashtë fushës. 58-vjeçari do të jetë pjesë e një grupi ekspertësh me qëllim të përmirësimit dhe modernizimit të futbollit gjerman në të gjitha nivelet.
Grupi përfshin figura të njohura si Sami Khedira, ish-lojtar i Real Madridit dhe kampion bote, si dhe drejtues klubesh nga Bundesliga dhe ligat e tjera gjermane. Drejtori menaxhues i DFL-së, Marc Lenz, theksoi rëndësinë e këtij grupi, në lidhje me nevojën për të vendosur kuadrot e duhura financiare, ligjore dhe sportive për mbajtjen e konkurrencës në Bundesliga. Grupi i ekspertëve do të ofrojë mendime të vlefshme për këtë objektiv.
Fokusi kryesor i grupit do të jetë në trajnimin dhe integrimin e talenteve të rinj, përmirësimin e standardeve dhe strukturave të klubeve, si dhe krijimin e një modeli të qëndrueshëm për konkurrencën e klubeve gjermane. DFL ka parashikuar që rezultatet e para do të prezantohen në pranverën e vitit 2026.
Përveç angazhimit të tij në DFL, Klopp do të vazhdojë si Kreu Global i Futbollit në grupin Red Bull, një rol që e mori në fillim të vitit 2025. Në këtë pozita, ai mbikëqyr zhvillimin e klubeve si RB Leipzig, RB Salzburg dhe New York Red Bulls, duke u fokusuar në zhvillimin e talenteve dhe emërimet e trajnerëve.
Në një intervistë për The Athletic, Klopp shprehu se nuk i mungon menaxhimi i një skuadre dhe se po shijon një jetë më të qetë pas largimit nga Liverpool. Ai tregon se është i lumtur me performancat e klubit dhe po e shijon kohën me familjarët e tij. Megjithatë, ai theksoi se, ndonëse do t’i kthehet punës, nuk dëshiron të jetë më trajner.
