Një krim i rëndë trondit Klosin mesditën e djeshme ku Fiqiri Mjeshtri vrau babë e bir, Liri dhe Kenado Shira, plagosi babë e bir, Eglantin dhe Renado Shira, ndërsa pas krimit vrau veten rreth 900 metra larg banesës së tij.
Dyshohet se shkak i krimit u bë vajza 16-vjeçare e autorit që shantazhohej me foto dhe video nga dy 17-vjeçarët Renado Hasula dhe Kenado Shira, djem tezesh me njëri-tjetrin.
Fatbardh Mjeshtri, vëllai i autorit, i cili ishte i pranishëm në vendin e ngjarjes, ka treguar të gjithë dinamikën e krimit. Ai thotë se dy adoleshentët i kanë lënë të lirë të flisnin çfarë të donin dhe ata po debatonin me njëri-tjetrin se kush kishte patur lidhje me vajzën apo se kush do e merrte për nuse.
Më pas, sipas vëllait të autorit, Fiqiri Mjeshtri i ka kërkuar Liri Shirës që t’ja merte vajzën për djalin, por ai i është përgjigjur se nuk do merrte për nuse për djalin një vajzë që ka shkuar me dy-tre djem.
“Vëllai i vogël Fiqiriu më tha mua, vëlla po shkoj tek shtëpia se dua të pyes gocën për disa fjalë se ishte shumë e tronditur dhe nuk mi ka shpjeguar mirë. Mirë i thashë shko. Kur shkuam të hanim bukë tek lokali. Feriti merr vëllain në telefon dhe vëllai i madh thotë për 20-30 minuta vijmë. Fiqiriun e dinim se ka ardhur për të takuar vajzën. Ne u ulëm prapë tek lokali. Besiku u ul me Shirët për të diskutuar të njëjtin problem. Hasulët nuk ishin aty, erdhën më pas. Shkova dhe unë dhe nxorri disa foto dhe mesazhe, edhe thoshte që goca nuk ka marrëdhënie veç me mua, por edhe me një tjetër. Me Hasulën. Më thotë merre në telefon që t’i sqarojmë gjërat pak më mirë. E mora në telefon dhe më tha do marr djalin dhe do të vij.
Erdhën në tavolinë dhe u bëmë 5-7 veta aty. E ofendoi djali i Shirës vajzën. Tha vajza jote…Fiqiriu vetëm po dëgjonte se nuk i lamë të drejtë fjalë unë dhe vëllai i madh, ai filloi dhe po debatonin bashkë të dy djemtë. Debatonin. Të dy 17-vjeçarëve u lamë liri për të folur. Debatuan, jo e ke pasur ti, jo e kam pasur unë. Jo merre ti për nuse, jo e marr unë. Nuk e dija që Fiqiriu kishte armë me vete, nuk do e linim për liri veprimi. E kisha afër dhe do e kapja. Nuk i kam parë asnjëherë armë. Ka qenë shumë i mbuluar dhe shumë i qetë. Nuk e dija që kisha armë me vete. Se nuk do e linim të vepronte.
Mbasi dëgjoi çunat duke debatuar për vajzën e tij. Vetëm i ka thënë fjalën e fundit, a do e marrësh për nuse vajzën time? Edhe babai i Shirës i ka thënë; unë nuk marr nuse që ka marrëdhënie me 2-3 çuna. Aty i tha vendimin ia jap unë kësaj pune, se jam unë prindi i asaj vajzës. U ngrit në këmbë, iku një metër larg nesh dhe vetëm kur pamë që i dha zjarr armës. Më pas, u largua në këmbë. Unë ika nga frika. Vëllai i madh i ka dhënë ndihmë atyre që po bërtisnin,”-tha Fatbardh Mjeshtri për mediat.
